عاطل

عندكشي شغلانه
عاطل وما لاقي
مراتي شغلاانا
تضرب وانا لاقي

زهقان وطافح كوته
كلامها كيف الدبش
انافق واقول بسكوته
صوتها لا لاان ولا دابش

عايش كما نوم غفير
للنوم عيونه مفارق
لشعري بتفتي بتكفير
القي ف طريقي المفارق

ف ليلي القى كامسطول
لانش ولاهش فيها
الفف عرض واقيس طول
ولا غير جنيهي شافيها

اضحك وابارك جمالها
والمدح كيف النفاق
دلوقتي بارك جملها
يا حزن قلبي اما فاق

ليلة سودة اما تجيني
تطلب لا ترفق بحالي
عجان وخرب عاجيني
كيف سور للضوء محالي

وان كنت بجري ف وريدها
وقت اما تغضب ما هيا
ابعت سكوتي ف بريدها
تبعتلي فين الماهية

وانا ربي يعلم هواها
عامل ف قلبي عمايل
حرمني اعشق سواها
كيف ليا انسي الجمايل

عشرة ما قلبي ناكرها
ياما سلامها وصلني
ما اقطعها لو هي كارها
كيف اقطع اللي وصلني

بس تيجي


حداد

دم ، كفن ، حداد


الظلم رافض فجر عيد
م الحزن شاب شعر الوليد
كل يوم اصبح حداد
واللون سواد
علي كل صورة ف قلب بيت
صورة شهيد
الأم تنجب والتراب يحضن ولادها ،
مات ولدها
والخبر رافض وصول
عاجز خجول
هارب بعيد وف بورسعيد
بلد سعيد والحزن عم كل دار
الفتنة نار ، والشعار إهدم كيان
نزع التيجان ، اقوي من حرب العدو بالدبابات
، الصبر مات
قبر السادات ، بيستغيث بابن البلد
إبني البلد ،
صوت الشهيد بيستغيث بابن البلد
إبني البلد
كل لحظة تمر مر
الغاز وغاز بنزين وجاز
فر كر ف محيط وزارة
عذب نيل أصبح مرارة
دمعة من حضن ابتسامة
سناريوا أشبه بالدرامه
والصرامة ،،، غايبة من امن البلد
اربعة وسبعين ولد ،،،
جهل في حب الوطن
سهل ف زرع الفتن
اخ يقبل الثمن ، يقتل اخوه
هو دا أخر زمن
اخ يقبل الثمن ، يقتل اخوه
اخ يقبل الثمن ، يقتل اخوه٠



فصيل دمك

فصيل دمك أنا منك أنا ليكي أنا إبنك أنا بيكي أكون أسعد ولا أذهد من الضحكة اللي ف عنيكي من الكلمة بنرضيكي ونهديكي الاااااف ماتت فدا أرضك حمي عرضك ولا وحدك راحَ اسيبك أنا غضبك أنا طيبك أنا زرعك أنا طينك أنا اسمي فدا إسمك أنا لحنك أنا رسمك أنا أسف لطول صمتي أهي قامتي ، وبرفعها وادي فرحة وبدفعها وبدفنها في قبر ف أرضك الطاهرة دموع قلب عيونك الساهرة أيا قاهرة ، ومقهورة من اولادك فدا كورة تغور دورة ومية دورة ولوصورة ، مضاد ثورة ماهو اعدائك من ابنائك فتيل فتنة ومعلونة قلوب قاسية وملعونة ومطبوعة بران قسوة ونون نسوه ومخفية ومنسية عن الساحة بتقتل فينا بأدينا وأمن بشوكة مكسورة ومحظورة كما الخايف ولا أعمي لكن شايف كما الشايف ومش شايف ونفس الصورة تجمعنا بلا معني وتبلعنا شقوق فتنة جدار بيتنا بيتمايل ، دموع قلبي مطر سايل وأنا شايفك بتتمايلي ، بتتحايلي علي ولادك ولا لذاتِك ف يوم أنكر ولا فراقك ف يوم اقدر أنا عاشق تراب أرضك ولا عاصي قانون فرضك أنا وردك وريحانك ولا إبني ف يوم خانك ولا شانك وعَشانك أكون قطرة ف نيل أرضك ، أكون جندي حمى لعرضك ويوم بردك أكون حضنك حنين دافي أكون شهدك كما الشافي أكون واااااافي أكون صافي كما يمك أشيل همك منا أصلي فصيل دمك انا إبنك فصيل دمك الإبن البار ضياء الإدريسي

جناين ورد

جناين ورد
ولساها السنين طارحة
جناين ورد عالشفة
شايفها لسه ف اللفة
بتضحكلي وأتخفى
وأدْفى
بفرحة ساكنة ف عيونها
ودمعة ف قلبي اخفيها
وأتخفى
وأملى بالعسل كاسي
وابيع همي اللي كان كاسي
وانسج خيطها بأديا
وتكبر كل يوم فيا
وافك الطبقة والتنية
وتيجي الفرحة الثانية
بنورها لسه ف اللفة
وتضحك ليا أتخفى
بداعبها
والاعبها
وتعملها وتضحكلي
ولساهم علي كتافي بيبتسموا
ويترسموا
حروف الحب جوايا
وتضحكلي سنين الفرح جياني
بتتمايل علي الأغصان
وبتنور دروب ظلمة
ودنيا بحالها ما تساوي
نظرة جميلة من نورهان
ولا بسمة عيون فاطمة
ولساها السنين طارحة
جناين ورد عالشفة

************

حضور نورهان الادريسي
الي دنيتي
17\3\2012

من صغري

من صغري ياناس طافح الكوتة

وبموت ف اليوم سبعين موتة

الفقر   الداء    والمال   غية

باكل اللي ف نفسي وعالنوتة

           من صغري يا ناس وانا متحير          

أشرب م الكاس طعمه اتغير

لا سياسي بقيت من يوم قالوا

إمشي ابعد ياد لسه صغير

من صغري يا ناس وانا متخيل

إني أكبر علي كلمة عيل

إن قلت أنا اعرف او أقدر

يقولولي ماتسكت تتنيل

من صغري ياناس والكيل طافح

وانا حلمي كبير ف الخير طامح

فلاح والترعة بترويني

علي كتفي الفاس بشقي واكافح

من صغري ياناس وانا ف الغربة

مشتاق للحمة وللشربة

والدنيا ف عيني بقالها زمان

ولا تسوى اللمة مع الصحبة

من صغري ياناس وانا متعلم

إن الأهرام راح تتكلم

وهتسمع الدنيا كلامها

إرحل إفهم مش هنسلم

من صغري ياناس وانا حلمي كبير

اكبر م الكرسي و م الدساتير

نفسي اعمل مشروع يجمعنا

على كلمة حب وفعل الخير

من صغري ياناس عايش راضي

ف الخير سباق ديمآ بادي

والحب ف قلبي لكل الناس

والدنيا بحالها الا حماتي

من صغري ياناس راضي بحالي

ولا   يفرق   جه  أو   راح   مالي

البسمة  ف   عين  الناس  نعمة

والشعر  ده  ذادي   وراسمالي

من صغري ياناس عايش محبوب

احصد ف ثمار ازرع ف حبوب

وتاريخي علمني ف بلدي

ولا عمري ف ليلة أبات مغلوب

من صغري ياناس عايش ف أمان

ولا حزبي اكون ولا نور واخوان

ولا عمري لحزب سياسي أميل

أنا سلفي بفطرة وعندي ايمان

العهد الجديد



الشاعر ضياء الادريسي كتب:

لو صحيح بتحبها افتح كتاب عهده جديد ،غرقه ف دم الشهيد وإكتب سلامي للوطن ، امحي الفتن ، نعلن بيان ننسي اللي خان ، نرفع اذان ، كل مكان ، يسمعه نسمعه ، لصم الأذان ، والي استهان ، بشعبنا نرفع ايدينا لربنا يارب لو ف الدنيا جنه الجنة تبقي ف أرضنا ، من هنا عدي المراكب واللي راكب نزله واللي فاكر السلطة تورته اوعاك ف يوم تأكله توكله علي ناس عشاها كله نوم ،كل يوم متصبحين علي سفرة واحدة تلمنا وحضن ام يضمنا شالت الرصاص من صدرها رفضت شبابها وبكرها ولأجل ما انت تبقي حر دفنت شهيدها ف بطنها لو صحيح بنحبها من هنا عدي بينا السفينه محملة. متحملة بأهات عهات من عهد فات والذكريات مؤلمة متلغمة بأهات شعوب ، وإحنا يادوب ، بكر الفرح ، بكرة الفرح الصبر واجب علي البشر، وفرض عين ع اللي انجرح ليه الصريخ التاريخ مش يعترف غير بالشرف ف الإنتخاب وف كل باب نفتحه نفتحو نفوقو بقا كفايه زور الظهور متشققا تعبت شقا والعنين مترشقا علي حلم فوق سطح القمر زي القمر ف ليل الظلام ، ليلة غمام تعمي البصر ، شوف القدر لحظة سحر ، ام بتدعي ربها يحمي ولادها م الفتن ، من الزمن وعقارب الساعة والمجاعة والغضب والحطب اللي بيحرق ارضها وعمي البصر وقت القدر ، واللي انكسر هنصلحه لو صحيح بنحبها ، لو بالشقا نشقا عادي ف أرضنا ، تطلع عنين اهلنا اقسمت عليك ياوطن اوعاك ترخصنا ، رخصنا بس لخدمتك لبسنا بس هدمتك ، سمعنا بس كلمتك ،كلمتك نحفظها نحفظها لإولاد صغار ، خافو الجدار يتهدم خافو الكيان يتقسم ، يتحسم ومين يفوز ف الإنتخاب الأحزاب ، والشباب، كله منا وكله لينا والسفينة محملة بالمسلمين ملتحين ، ومنقبات والأقباط مننا، من هنا، الدم فيهم دمنا ، وحضن ام يضمنا اسمع بنا ، هي دي مصر العظيمة ، التاريخ ليها اتبني امن وامان طول الزمان يشهد كتاب ربنا يشهد علينا الرسول ان احنا اصل ف الكرم فيها المبادئ والقيم والعلم نابع منها اسأل سماها وأرضها اسأل كتابها وعهدها اسأل تاريخها ومجدها لو تموت كل الشعوب محال تموت بلد الأزهر حضنه ف حضنها والنيل بيجري ف ارضها ضخ الدم ف قلبها لو صحيح بتحبها